 |
| ការស្ទាក់រថយន្តខណៈពេលគណបក្សសង្គ្រោះជាតិធ្វើមហាបាតុ កម្មនាពេលកន្លងមក (រូបថត ណាត សុភាព) |
ពលរដ្ឋមកពីតាមបណ្តាខេត្តមួយចំនួន ដែលមកចូលរួមបាតុកម្មបាននាំគ្នាបិទផ្លូវ បន្ទាប់ពីខឹងសម្បានឹងសមត្ថកិច្ច ដែលស្ទាក់រថយន្តរបស់ពួកគេមិនចង់ឲ្យធ្វើដំណើចូលរាជធានីភ្នំពេញ ខណៈដែលគណបក្សសង្គ្រោះជាតិធ្វើបាតុកម្មលើកទី៣នេះ។
អ្នកស្រី អ៊ី ចន្ធូ មកពីខេត្តតាកែវ បានឲ្យVOD ដឹងនៅព្រឹកថ្ងៃពុធនេះថា រហូតមកដល់ម៉ោង៩ព្រឹកនេះ សមត្ថកិច្ចបានឃាត់រថយន្តរបស់គាត់ ចំនួន២កន្លែងដោយគ្មានមូលហេតុ ធ្វើឲ្យអ្នកដំណើខឹងក៏នាំគ្នាបិទផ្លូវ គឺនៅលើស្ពានជាប់ព្រំប្រទល់ ស្រុកបាទី និងខេត្តកណ្តាល និងនៅចំណុចស្រុក កណ្តាលស្ទឹង ខេត្តកណ្តាល។ អ្នកស្រីថា ដោយឡែកប្រជាពលរដ្ឋផ្សេងៗទៀត នៅតាមឃុំមួយចំនួនក្នុងស្រុកបាទី ខេត្តតាកែវ ត្រូវបានអាជ្ញាធរ ឃុំរារាំងមិនឲ្យពួកគេមកចូលរួមមហាបាតុកម្មនោះទេ ៖ "ពួកបាតុករកំពុងធ្វើឈើ ស្ទាក់ផ្លូវមិនឲ្យចេញទាំងអស់បង និងនាំគ្នាឈរពេញផ្លូវទាំងអស់ ឥឡូវឡានចេញមិនរួច នាំគ្នាជិះម៉ូតូបង តែនៅតែបីបួនប្រាំឡានទេ ដែលនៅក្នុងស្រុកបាទីហ្នឹង ចេញមកជាមួយគ្នាហ្នឹងមកជាប់។ ឥឡូវចេញផុតពីខេត្ដតាកែវ មកចូលខេត្ដកណ្ដាលទៀត" ។
សមត្ថកិច្ចនៅខេត្តតាកែវ មិនទាន់អាចទាក់ទងបាននៅឡើយទេ។ ប៉ុន្តែស្នងការរងនគរបាល ខេត្តកណ្តាល លោក កង សំបូរ ទទួលស្គាល់ថា ពិតជាមានការស្ទាក់រថយន្តត្រួតពិនិត្យមែន តែមិនមានការហាមឃាត់ចូលរួមបាតុកម្ម ដូចការអះអាងរបស់ប្រជាពលរដ្ឋនោះទេ ៖ "អត់ទេ គេត្រួតពិនិត្យច្បាប់ចរាចរណ៍ធម្មតាទេ ចរាចរណ៍ផ្លូវគោក" ។
នៅតាមផ្លូវជាតិលេខ៥ ពីខេត្តបន្ទាយមានជ័យ បាត់ដំបង ពោធិ៍សាត់ និងកំពង់ឆ្នាំង ឆ្ពោះមករាជធានីភ្នំពេញ ក៏សមត្ថកិច្ចស្ទាក់រថយន្តអ្នកដំណើរដូចគ្នានេះដែរ។ អនុប្រធានក្រុមការងាររបស់គណបក្សសង្គ្រោះជាតិ ខេត្តបន្ទាយមានជ័យ លោក មាជ សុវណ្ណារ៉ា បានឲ្យដឹងដែរថា សមត្ថកិច្ចបានស្ទាក់រថយន្តរបស់ពលរដ្ឋដើម្បីត្រួតពិនិត្យ តែមិនមានការហាមឃាត់នោះទេ ៖ "នៅពេលដែលយើងចេញពីបន្ទាយមានជ័យមក មានប៉ូលីសគេមកកាក់ ដើម្បីឆែក ដោយសារតែគេដឹងថាឡានហ្នឹងជាឡានជួលឲ្យសកម្មជន និងប្រជាពលរដ្ឋគណបក្សសង្គ្រោះជាតិ ពីខេត្ដបន្ទាយមានជ័យ អញ្ចឹងវាខុសពីសព្វដង គេដឹងថា ឡានហ្នឹងឡានក្រុងដែរ គឺប៉ូលិសគេអត់ឆែកទេ ដោយសារគេដឹង ប៉ុន្ដែមិនអីទេ ក្រោយមកយើងដោះស្រាយបញ្ហា" ។
លោក មាជ សុវណ្ណារ៉ា បន្ថែមថា នៅក្នុងខេត្តសំខាន់ៗទាំង១៥នៅកម្ពុជា គណបក្សសង្គ្រោះជាតិ បានកំណត់ចំនួនអ្នកចូលរួមប្រមាណ៦ម៉ឺននាក់ ហើយអ្នកចូលរួមទទួលបានប្រាក់ឧបត្ថម្ភ ថ្លៃធ្វើដំណើរពីសបុរសជន ពី៣ ទៅ៤ ដុល្លារ ក្នុងម្នាក់។ លោកថា ក្រៅពីនោះមានប្រជាពលរដ្ឋជាច្រើននាក់ផ្សេងទៀត បានលក់មាន់ ទា ដើម្បីយកលុយធ្វើដំណើរមករាជធានីភ្នំពេញ ដោយខ្លួនឯងមិនឲ្យក្រុមការងារបក្សបារម្ភនោះទេ។
បើតាមក្រុមការងារឃ្លាំមើលសិទ្ធិមនុស្សប្រចាំតាមផ្លូវជាតិនីមួយៗ ដែលដឹកនាំដោយអង្គការ KYA និង CHRAC ឲ្យដឹងថា នៅលើផ្លូវជាតិលេខ ៦A ចាប់ពីភ្នំពេញដល់ ស្ពានព្រែកតាមាក់ ផ្លូវជាតិលេខ ៥ ចាប់ពីភ្នំពេញដល់ ផ្សារត្រាច ស្រុកកំពង់ត្រឡាច មិនមានការស្ទាក់រថយន្ត និងត្រួតពិនិត្យទេ។ ផ្ទុយកាលពីបាតុកម្មលើកមុនៗដែលនៅតាមដងផ្លូវទាំងនេះគឺតែងតែមានការរារាំងរថយន្តរបស់អ្នកដំណើរមិនឲ្យចូលរាជធានីភ្នំពេញ នៅពេលគណបក្សសង្គ្រោះជាតិធ្វើបាតុកម្ម៕
ប្រភពពី៖ VOD
No comments:
Post a Comment