 |
| ទីប្រឹក្សានាយករដ្ឋមន្រ្តី លោក ជុំ កុសល/រូបថតពីហ្វសប៊ុក |
ទីប្រឹក្សានាយករដ្ឋមន្ត្រី លោក ជុំ កុសល នៅថ្ងៃពុធនេះ រិះគន់អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្ស លោក សុរិយា ស៊ូប៊ែឌី ដោយសង្ឃឹមថាលោក ស៊ូប៊ែឌី នឹងមានសុភវិនិច្ឆ័យ និងឈរលើគោលការណ៍អព្យាក្រិត្រស្តីពីសិទ្ធិមនុស្សនៅកម្ពុជា។
ការរិះគន់នេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានជួបជាមួយលោក សុរិយា ស៊ូប៊ែឌី រយៈពេល៣ម៉ោង និង៣០នាទី នៅវិមានសន្តិភាព នៅព្រឹកថ្ងៃពុធនេះ។
លោក ជុំ កុសល បានបង្ហោះនៅលើហ្វេសប៊ុករបស់ខ្លួនភ្លាមៗបន្ទាប់ពីជំនួបថា ក្នុងរយ:ពេល៣ម៉ោងនៃជំនួបនេះ លោកស៊ូប៊ែឌី «បានភ្លឺភ្នែកច្រើនណាស់ស្តីពីស្ថានភាពពិតនៅកម្ពុជាផ្តោតលើបញ្ហាសិទ្ធិមនុស្ស ពិសេសស្ថានការណ៍ពិតនាបច្ចុប្បន្នកាល ផ្ទុយពីស្ថានការណ៍ដែលមានក្នុងរបាយការណ៍»។ លោក ជុំ កុសល សង្ឃឹមថា លោកស៊ូប៊ែឌី នឹងមានសុភវិនិច្ឆ័យនិងឈរលើគោលការណ៍អព្យាក្រិត្រស្តីពីសិទ្ធិមនុស្សនៅកម្ពុជា។
VOD មិនទាន់អាចសុំការអត្ថាធិប្បាយពីលោក ស៊ូប៊ែឌី បាននៅឡើយទេ។
ក្នុងជំនួបនេះ លោកនាយករដ្ឋមន្ត្រី ហ៊ុន សែន បានស្នើឲ្យអ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្ស លោក សុរិយា ស៊ូប៊ែឌី ជួយឲ្យតំណាងរាស្ត្រគណបក្សសង្គ្រោះជាតិ ចូលសភាជាមុនសិន ដើម្បីជាការឈានដល់ការទម្លាយភាពទ័លច្រកនានា។
បន្ទាប់ពីជំនួប ប្រធានអង្គភាពប្រឆាំងអំពើពុករលួយ និងជាប្រធានគណកម្មធិការសិទ្ធិមនុស្សកម្ពុជាលោក ឱម យិនទៀង បានថ្លែងទៅកាន់អ្នកសារព័ត៌មានថា ជំនួបរវាងលោកនាយករដ្ឋមន្ត្រី និងលោក ស៊ូប៊ែឌី នេះល្អ មានការនិយាយអស់ពីពោះ និងស្តាប់គ្នាទៅវិញទៅមក ដោយយល់ពីគ្នា។ លោកបន្តថា លោកនាយករដ្ឋមន្ត្រី បានសុំឲ្យលោក ស៊ូប៊ែឌី ជួយជំរុញគណបក្សប្រឆាំង ចូលរួមក្នុងសភា ដើម្បីដោះស្រាយបញ្ហាននា។លោក ឱម យិនទៀង ឲ្យដឹងទៀតថា លោកនាយករដ្ឋមន្ត្រីបញ្ជាក់ទៅលោក ស៊ូប៊ែឌីថា គណបក្សប្រឆាំង មានសិទ្ធិកោះហៅរដ្ឋមន្ត្រីរដ្ឋាភិបាល មកសាកសួរ ហើយនាយករដ្ឋមន្ត្រី ក៏ចង់ឲ្យគណបក្សប្រឆាំង ត្រួតពិនិត្យមើលសមាជិករបស់រដ្ឋាភិបាលផងដែរ ដើម្បីជាការសម្រួលការងារ។លោក ឱម យិនទៀង បញ្ជាក់ថា លោកស៊ូប៊ែឌី បានទទួលយកសំណើររបស់លោកហ៊ុន សែន។
លោក ហ៊ុន សែន បញ្ជាក់ថា អនុសាសន៍របស់លោកស៊ូប៊ែឌីច្រើនណាស់ មានក្នុងកម្មវិធីនយោបាយរបស់រដ្ឋាភិបាល និងច្បាប់កម្ពុជាដែលមានស្រាប់។
គួរបញ្ជាក់ថា លោក សុរិយា ស៊ូប៊ែឌី អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំ កម្ពុជា កំពុងបំពេញបេសកកម្មនៅកម្ពុជារយៈពេល ៥ថ្ងៃ ដោយលោកបានមកដល់កម្ពុជាកាលពីថ្ងៃទី១២ ខែមករា និងចាកចេញពីកម្ពុជាវិញនៅថ្ងៃទី១៨ ខែមករា ឆ្នាំ២០១៤៕
ប្រភពពី៖ VOD
No comments:
Post a Comment