I love khmer news: ឪពុកអនាថាដាក់ច្រវាក់កូនដែលពិការភ្នែក និងមានជំងឺផ្លូវចិត្ត ក្រោមរូងថ្ម ព្រោះខ្លាចរត់ធ្វើឲ្យឈឺចុកចាប់ខ្លួន

រូបភាពដ៏គួរឲ្យរំជួលចិត្ត ទាំងនេះ ដែលបង្ហាញឲ្យឃើញពីបុរសពីការភ្នែកតាំងពីកំណើត និងថែមទាំងមានជំងឺរោគផ្លូវចិត្ត ឈ្មោះ Cheng Xiangtao អាយុ ២៦ ឆ្នាំ ត្រូវបានឪពុករបស់គាត់សម្រេចចិត្តដាក់ច្រវាក់ជើង នៅក្នុងរូងថ្មមួយកន្លែង ស្ថិតនៅក្នុងភូមិដាច់ស្រយាល Chengling ខេត្ត Henan (ចិន) បានបង្កឲ្យកើតមានកំហឹងជាសាធារណៈពេញផ្ទៃប្រទេស ។

ឪពុកឈ្មោះ Cheng Yuanchao អាយុ ៧០ ឆ្នាំរូបនេះ បាននិយាយថាៈ គាត់បានបោះបង់កូនប្រុសរបស់គាត់ម្នាក់នេះ បន្ទាប់ពីបានបាត់បង់ផ្ទះរបស់គាត់ ហើយមកទល់ពេលនេះ គាត់ទៅរស់នៅឯផ្ទះកូនស្រីរបស់គាត់ប៉ុណ្ណោះ ។ គាត់បានបន្តថា “សព្វថ្ងៃនេះ ខ្ញុំគ្មានផ្ទះផ្ទាល់ខ្លួនទេ និងគ្មានទីកន្លែង ដើម្បីផ្តល់ជម្រកដល់កូនប្រុសម្នាក់នេះថែមទៀត ។ នេះគឺជាវិធីដ៏ល្អបំផុត ដែលខ្ញុំសម្រេចចិត្តធ្វើ ។ ខ្ញុំទៅមើលវា ៣ ដង ក្នុង១ថ្ងៃ ដើម្បីយកទឹក និងអាហារដល់វា ដូច្នេះ វាពុំដែលស្រែកឃ្លានទេ” ។

លោកតា Yuanchao បានបញ្ជាក់ថា “ការដាក់ច្រវាក់វានៅទីនោះ គឺក្នុងបំណងមិនឲ្យវារត់ចេញឆ្ងាយៗ និងធ្វើឲ្យខ្លួនវាឈឺចុកចាប់” ។

គាត់បានរៀបរាប់ថា “ខ្ញុំមិនមែនជាមនុស្សមានទ្រព្យសម្បត្តិស្តុកស្តមនោះទេ ហេតុដូច្នេះហើយ យើងពុំអាចមានលទ្ធភាពលៃលកប្រាក់គ្រប់គ្រាន់ ដើម្បីស្វែងរកគ្រូពេទ្យ មកជួយព្យាបាលវាបាន ។ នៅទីនោះ គឺមិនមែនជាកន្លែងដែលវាត្រូវទៅនោះទេ ហើយខ្ញុំក៏មិនចង់ឃើញវាស្ថិតក្នុងស្ថានភាពបែបនោះដែរ ប៉ុន្តែ ខ្ញុំគ្មានជម្រើស” ។

គាត់បានបន្ថែមថា “វាមិនស្លៀកខោអាវ និងប្រសិនបើមិនដាក់ច្រវាក់វាទេ នោះវានឹងរត់គ្រប់ទីកន្លែង ដែលបណ្តាលឲ្យធ្វើឲ្យវាឈឺចុកចាប់” ។

ប៉ុន្តែ ទិដ្ឋភាពទាំងនេះ បានធ្វើឲ្យបណ្តាអ្នកនិយមលេងអ៊ីនធើរណេតចិន មានការភ្ញាក់ផ្អើល និងរំជួលចិត្តជាខ្លាំង បន្ទាប់ពីរូបភាពទាំងនេះ ត្រូវបានចុះផ្សាយនៅក្នុងបណ្តាញសង្គមរួចមក ៕