 |
| ក្រុមសន្តិសុខ និងអាជ្ញាធរក្រុងភ្នំពេញ បានប្រើហិង្សាយ៉ាងកំរោលរំលោភលើបុរសម្នាក់ ក្នុងចំណោមពលរដ្ឋបុរីកីឡាជាច្រើននាក់ ក្នុងពេលប៉ះទង្គិចគ្នាកាលពីម្សិលមិញ។ រូបថត ហុង មិនា |
ភ្នំពេញៈ បន្ទាប់ពីមានការប៉ះទង្គិចគ្នាចំនួនពីរលើក រវាងប្រជាពលរដ្ឋរងគ្រោះដោយសារបញ្ហាវិវាទដីធ្លី និងសមត្ថកិច្ច កាលពីព្រឹកម្សិលមិញ ដែលយ៉ាងហោចណាស់ ប្រជាពលរដ្ឋ ២ នាក់រងរបួស និងម្នាក់ត្រូវបានចាប់ខ្លួន ភ្លាមៗបន្ទាប់ពីនោះ លោក ប៉ា សុជាតិវង្ស អភិបាលរាជធានីបានប្រកាសដកហូតសិទ្ធិគ្រប់គ្រង តំបន់ បុរីកីឡា ពីក្រុមហ៊ុន ផានអ៊ីម៉ិច។ នេះបើតាមតំណាងប្រជាពលរដ្ឋរងគ្រោះ ដែលបានចូលជួបលោក ប៉ា សុជាតិវង្ស។
កាលពីព្រឹកម្សិលមិញ មានការប៉ះទង្គិចគ្នាពីរលើកដែលយ៉ាងហោចណាស់ធ្វើឲ្យប្រជាពលរដ្ឋ ចំនួន ២នាក់ បានរងរបួស និងម្នាក់ត្រូវបានចាប់ខ្លួន ខណៈដែលប្រជាពលរដ្ឋជិត ២០០ នាក់ មកពី ៥ សហគមន៍ បានដើរតវ៉ា ហើយបានបិទកំណាត់ផ្លូវ ព្រះមុនីវង្ស នៅខាងមុខសាលារាជធានី។
ប្រជាពលរដ្ឋទាំងនេះ មកពីសហគមន៍ បុរីកីឡា បឹងកក់ ថ្មគោល បឹងឈូក និងសហគមន៍ ស្ទឹងមានជ័យ ដោយពួកគាត់ បានដើរដង្ហែជាក្បួន ពីតំបន់ បុរីកីឡា ស្ថិតក្នុងសង្កាត់ វាលវង់ ខណ្ឌ ៧ មករា សំដៅមកសាលារាជធានី ប៉ុន្តែនៅខណៈដង្ហែមកដល់ខាងមុខវិមានសន្តិភាព ពលរដ្ឋក៏បានឈប់តវ៉ានៅទីនោះ ហើយបានប៉ះទង្គិចគ្នាជាមួយកម្លាំងសមត្ថកិច្ច បណ្តាលឲ្យយុវនារី ញ៉ែន ស្រីមុំ អាយុ ១៤ ឆ្នាំ និងអ្នកស្រី សោម ចាន់ណាវី អាយុ ៤៣ ឆ្នាំ រងរបួស។ បន្ទាប់មក នៅវេលាម៉ោងប្រមាណ ៩ និង ៤៥ នាទីព្រឹក ពលរដ្ឋទាំងនោះ ក៏បានបិទកំណាត់ផ្លូវ ព្រះមុនីវង្ស ខាងមុខសាលារាជធានី ហើយក្រុមសន្តិសុខបានចូលទៅវាយប្រជាពលរដ្ឋទាំងនោះ និងបានចាប់ខ្លួនបុរសម្នាក់។
លោក ចាន់ សុវេត មន្ត្រីស៊ើបអង្កេតជាន់ខ្ពស់សមាគមការពារសិទ្ធិមនុស្ស អាដហុក បានឲ្យដឹងថា បន្ទាប់ពីមានការប៉ះទង្គិចគ្នា អាជ្ញាធររាជធានីបានអនុញ្ញាតឲ្យតំណាងប្រជាពលរដ្ឋចំនួន ១០ នាក់ មកពីសហគមន៍ បុរីកីឡា បឹងកក់ និងថ្មគោល ចូលជួបជាមួយអភិបាលរាជធានី។ លោកបានឲ្យដឹងថា៖ «ប្រសិនបើសាលារាជធានី មានក្រុមការងារមកសម្របសម្រួលតាំងពីដំបូងក៏គ្មានការបិទផ្លូវ ហើយក៏គ្មានការប៉ះទង្គិចគ្នា និងមានការចាប់មនុស្សបែបនេះដែរ»។
លោក ពេជ្រ លឹមឃួន តំណាងប្រជាពលរដ្ឋសហគមន៍ បុរីកីឡា បានឲ្យដឹងថា នៅក្នុងជំនួបពិភាក្សាប្រមាណ ៣០ នាទីនោះបន្ទាប់ពីបានស្តាប់ពីការរៀបរាប់នូវទុក្ខលំបាករបស់ប្រជា ពលរដ្ឋ លោក ប៉ា សុជាតិវង្ស បានថ្លែងដោយផ្តល់ក្តីសង្ឃឹមដល់ប្រជាពលរដ្ឋនៅសហគមន៍ បុរីកីឡា។
លោក លឹមឃួន បានអះអាងថា៖ «លោក ប៉ា សុជាតិវង្ស បានប្រកាសនៅចំពោះមុខខ្ញុំ និងតំណាងប្រជាពលរដ្ឋមួយចំនួនទៀតថា គាត់នឹងដកហូតសិទ្ធិគ្រប់គ្រងតំបន់ បុរីកីឡា ពីក្រុមហ៊ុន ផានអ៊ីម៉ិច ហើយគាត់នឹងកោះអញ្ជើញតំណាងក្រុមហ៊ុនមកប្រជុំជាបន្ទាន់ ស្ដីពីបញ្ហានេះ នៅល្ងាចថ្ងៃពុធ [ម្សិលមិញ]»។ លោក ប៉ា សុជាតិវង្ស បានសន្យាថា គាត់នឹងដោះស្រាយបញ្ហាលំនៅឋាន ជូនប្រជាពលរដ្ឋ បុរីកីឡា ទាំងអស់គ្នា នៅក្នុងកាលៈទេសៈដ៏សមរម្យមួយ ប៉ុន្តែ លោកអភិបាលបានសុំឲ្យប្រជាពលរដ្ឋផ្ដល់ពេលវេលាបន្ថែមទៀតសម្រាប់ រូបគាត់។ ទោះជាបែបណា លោក លឹមឃួន បាន បញ្ជាក់ថា នៅក្នុងរយៈពេលមួយខែទៀតប្រសិនបើមិនមានដំណោះស្រាយទេពួកលោក នឹងធ្វើការតវ៉ាជាថ្មីទៀត។
 |
| កងកម្លាំងសាលារាជធានី ព្រួតគ្នាសង្គ្រប់វាយទាត់ធាក់បុរសអ្នកតវ៉ា។ រូបថត ម៉ៃ វីរៈ |
ចំណែកឯលោក ចាន់ ពុទ្ធិសក្ដិ តំណាងពលរដ្ឋសហគមន៍ បឹងកក់ ចំនួន ១៩ គ្រួសារ ដែលមកពីភូមិ ១ សង្កាត់ ស្រះចក ខណ្ឌ ដូនពេញ បាននិយាយថា នៅក្នុងជំនួបនោះ លោក ប៉ា សុជាតិវង្ស មិនបាន សន្យាណាមួយ ក្នុងការដោះស្រាយបញ្ហាដីធ្លីនៅតំបន់ បឹងកក់ ទេ។ លោក ពុទ្ធិសាក់ បានថ្លែងថា៖ «គាត់បានប្រាប់ឲ្យយើងខ្ញុំនៅស្ងៀមមួយរយៈសិន ប៉ុន្តែមិនបានប្រាប់ថាតើគាត់នឹងដោះស្រាយបញ្ហារបស់យើងខ្ញុំនៅ ពេលណានោះទេ»។ លោក ពុទ្ធិសាក់ បានអះអាងថា នៅពេលដែលលោកបានសួរដេញដោល ថាតើនៅពេលណា ទើបដោះស្រាយបញ្ហាជម្លោះដីធ្លីដ៏រ៉ាំរ៉ៃ នៅតំបន់ បឹងកក់ នោះ លោក សុជាតិវង្ស បានជំរុញឲ្យលោកទៅដើរតវ៉ាតាមអ្នកស្រី ទេព វន្នី តំណាងសហគមន៍ បឹងកក់។ «នេះគឺជាចម្លើយមួយដែលធ្វើឲ្យយើងខ្ញុំគ្មានក្ដីសង្ឃឹមទាល់តែ សោះថា មានដំណោះស្រាយ»។
លោក ឡុង ឌីម៉ង់ អ្នកនាំពាក្យសាលារាជធានីបានថ្លែងថា លោកអភិបាល ពិតជាបានមានប្រសាសន៍ដូចអ្វីដែលតំណាងពលរដ្ឋក្នុងសហគមន៍ បុរីកីឡា បានលើកឡើងមែន ប៉ុន្តែអ្វីដែលខាងតំណាងសហគមន៍ បឹងកក់ អះអាងនោះមានចំណុចខ្លះ មិនត្រឹមត្រូវទេ។ លោកថ្លែងថា៖ «ដូចដែលឯកឧត្តមអភិបាល បានលើកឡើង នៅក្នុងជំនួបប្រជុំពិភាក្សា ជាមួយពលរដ្ឋនៃសហគមន៍ បឹងកក់ កាលពីប៉ុន្មានថ្ងៃមុនថា ដំណោះស្រាយនឹងត្រូវដោះជូនបងប្អូនទាំងអស់នៅក្នុងតំបន់ បឹងកក់ ប៉ុន្តែ ការដោះស្រាយគឺត្រូវធ្វើឡើងមួយជំហានម្ដងៗ តាមដំណាក់កាល និងស្របតាមនីតិវិធីច្បាប់»។
អ្នកស្រី ស៊ុយ សុផាន ប្រធានក្រុមហ៊ុន ផានអ៊ីម៉ិច ដែលទទួលបានសិទ្ធិគ្រប់គ្រងតំបន់ បុរីកីឡា មិនអាចទាក់ទងសុំការពន្យល់បានទេ កាលពីម្សិលមិញ៕
ប្រភពពី៖ ខ្មែរស្ថាបនា
No comments:
Post a Comment