សុគន្ធ​និសា​ប្រកាស​គោលជំហរ​ពីរ

តារា​ចម្រៀង​ផលិត​កម្ម​ថោន​នាង សុគន្ធ និសា។ រូបថត សេត គឹមសឿន

ភ្នំពេញៈ ក្រៅពី ​ព្យាយាម​លាក់បាំង​ឱកាស​ឡើង​គ្រង​តំណែង​ជា​តួឯក​ ភាពយន្ត​ជា​លើក ដំបូង

 បន្ទាប់ពី​ចាប់​អាជីព​ជា​តារាចម្រៀង​ជាង​មួយ​ទសវត្យរ៍ និង​ធ្លាប់​គ្រង​តំណែង​តារាចម្រៀង​កំពូល​

ផង​នោះ តារាចម្រៀង​ថមថយ​ប្រជាប្រិយ ក្រោយ​រត់​ចេញ​ពី​ទ្រនំ​ហង្សមាស គេច​ពី​គូស្នេហ៍​

លោក សុខ ជំនោរ ចូល​ជ្រក​ផលិតកម្ម​ថោន នាង សុគន្ធ នីសា បាន​ប្រកាស​បិទដំណើរ​

ជើងមេឃ​ចេញ​ច្រៀង​ក្រៅ​ប្រទេស ដើម្បី​យក​ឱកាស​ក្តោប​យក​ការងារ​សិល្បៈ​ក្នុង​ស្រុក​ស្តារ​

មុខមាត់​ឡើង វិញ ។

គេ​សង្កេត​ឃើញ​ថា រយៈពេល​ប្រមាណ​ជា​ពីរ​បី​ឆ្នាំ​ចុងក្រោយ​នេះ បន្ទាប់ពី​ដំណើរ​ចូល​ទៅ​ជ្រក​

នៅ​ក្រោម​ដំបូល​ផលិតកម្ម​ថោន បទ​ថ្មីៗ​របស់​តារាចម្រៀង​យុវវ័យ សំឡេង​បែប​មនោសញ្ចេតនា  

មាន​កំណើត​ពី​ខេត្ត​ក្រចេះ នាង សុគន្ធ នីសា មាន​បទ​ថ្មី​ចេញ​ជា​បន្តបន្ទាប់ មិន​ចាញ់​

តារាចម្រៀង​ឆ្នើមៗ​របស់​ផលិតកម្ម​ផ្សេង​ដែល​ជា​គូប្រជែង​ឡើយ។ ប៉ុន្តែ​រាល់​បទចម្រៀង​

ទាំងនោះ​ហាក់​មិន​សូវ​ជា​ទទួល​បាន​ការ​លេចធ្លោ​នោះ ឡើយ គ្រា​ដែល​ម្ចាស់​សំឡេង​មិន​សូវ​ជា​

បង្ហាញ​វត្តមាន​ឡើង​ឆាក​ប្រគំតន្រ្តី ក្នុង​ស្រុក ដោយសារ​តែ​នាង​សង្វាត​តែ​ដំណើរ​ហោះហើរ​ទៅ​

កើប​ប្រាក់​នៅឯ​នាយសមុទ្រ​នោះ​។

ទោះ ជា​យ៉ាង​ណា​តារាចម្រៀង​ដែល​ធ្លាប់​ឡើង​គ្រងតំណែង​ជា​តារាចម្រៀង​កំពូល គ្រា​ដែល​មាន​

វត្តមាន​នៅ​ផលិតកម្ម​ហង្សមាស នាង សុគន្ធ នីសា ហាក់​ទទួល​ស្គាល់​ពី​ការ​ធ្លាក់​ចុះ​

ប្រជាប្រិយភាព​នេះ ហើយ​បាន​ប្រកាស​ខ្លួន​ងាក​មក​រក​ការងារ​ដ៏​មមាញឹក​នៅក្នុង​ស្រុក​វិញ។ ការ​

ប្រកាស​នេះ ធ្វើ​ឡើង​បន្ទាប់ពី​នាង​បញ្ចប់​ការ​សម្ដែង​ភាពយន្ត​ជា​លើក​ដំបូង​ក្នុង រឿង «​ចងចាំ​» 

ដែល​ជា​ស្នាដៃ​ផលិត​លើក​ដំបូង​របស់​ផលិតកម្ម​ថោន​។

ក្នុង ពាក្យសម្តី​ពុំ​មាន​ការ​ស្ទាក់ស្ទើរ​នោះ សុគន្ធ និសា បាន​អះអាង​ថា៖​«សម្រាប់​ឆ្នាំ​២០១៤ ខាង​

មុខ ខ្ញុំ​មាន​គោលការណ៍​ចំនួន​២ ដែល​បាន​តាំង​ចិត្ត​រួច​ហើយ​។ ទី​១​គឺ​មិន​ទទួល​សំណើ​ចេញ​

ច្រៀង​នៅ​ក្រៅ​ប្រទេស​ក្នុង​អំឡុង​ឆ្នាំ​២០១៤ ជា​ដាច់​ខាត បើ​ទោះ​ជា​មាន​ស្ប៉នស័រ​ទាក់ទង​យ៉ាង​

ណា​ក៏​ដោយ។ ជំហរ​ទី​២ គឺ​ចាំបាច់​មាន​ពេល​គ្រប់គ្រាន់ ក្នុង​ការ​មើល​ខុសត្រូវ​មុខ​ជំនួញ​ទាំង​ពីរ​

របស់​ខ្ញុំ គឺ​ហាង​ផឹកស៊ី​មួយ​កន្លែង និង​ហាង​ថ្មី​មួយ​កន្លែង​ទៀត​នៅ​សាលា​៨​មីនា ដែល​ទើប​

ដំណើរការ​»។

ក្រៅពី​បង្ហាញ​នូវ​ជំហរ​ជា​មូលដ្ឋាន​ ដើម្បី​ពង្រឹង​ប្រជាប្រិយភាព និង​មុខ​ជំនួញ​ខ្លួន​នោះ សុគន្ធ 

នីសា ក៏​បាន​បញ្ជាក់​ថា៖​«ការ​តាំង​ចិត្ត​នេះ ហាក់​ស្រប​នឹង​ការ​ចង់​បាន​របស់​អ្នក​គាំទ្រ​ភាគច្រើន

 ដែល​ចង់​ឲ្យ​ខ្ញុំ​ត្រាំត្រែង​ឲ្យ​បាន​ពេញលេញ ក្នុង​កាលៈទេសៈ​ដែល​ការ​ប្រគំតន្ត្រី​គគ្រឹកគគ្រេង​

កំពុង​ចាប់ផ្តើម នោះ​»។

នៅ​អំឡុង​ដើមឆ្នាំ​២០១៤​ខាង​មុខ សុគន្ធ និសា នឹង​បញ្ចេញ​ខ្សែរឿង «​ចងចាំ​» ដែល​នាង​បាន​

សម្ដែង​ជា​តួឯក ដើម្បី​ស្ទាបស្ទង់​ទីផ្សារ ក្នុង​ពេល​ខ្សែរឿង​ទាំងមូល​ដាក់​បញ្ចាំង​។ ទាំង​រូបនាង​

ផ្ទាល់ និង​ផលិតកម្ម​ថោន បាន​រំពឹង​យ៉ាង​ខ្លាំង​ថា ខ្សែ​រឿង​នេះ នឹង​ទទួល​ជោគជ័យ ប៉ុន្តែ​គេ​មិន​

ដឹង​ថា តើ​វា​ជោគជ័យ​ពេញ​ទំហឹង ឬ​បាន​ត្រឹម​មួយ​ឆាវ​ដូច​ខ្សែ​រឿង​ដែល​ធ្លាប់​រំពឹង​ខ្ពស់ មួយ​ចំនួន​

នោះ​ទេ​។

តារា​មាន​កែវភ្នែក​ស្រទន់ សុគន្ធ និសា បាន​ប្រាប់​ថា ការ​បញ្ចេញ​ខ្សែរឿង គឺ​យុទ្ធសាស្ត្រ​ធំ​មួយ

 សម្រាប់​ឆ្នាំ​២០១៤ ខណៈ​ដែល​យុទ្ធសាស្ត្រ​នេះ គឺ​នៅ​មាន​ទម្រង់​ជាច្រើន ទៀត​ដើម្បី​ប្រទាញ​ឲ្យ​

បាន​ច្រើន​នូវ​ប្រជាប្រិយភាព​បន្ថែម​។ ក្នុង​នោះ ការ​រំលេច​ក្បាច់រាំ​ប្លែកៗ និង​ការ​ចេញ​ច្រៀង​បទ​

បែប​ក្រមិចក្រមើម គឺជា​អ្វី​ដែល​នាង​បន្ត​ដើរ​នៅ​លើ​មាគ៌ា​សិល្បៈ​។

សុគន្ធ និសា បាន​ឲ្យ​ដឹង​ថា យោង​តាម​យុទ្ធសាស្ត្រ​របស់​នាង​សង្ឃឹម​ថា​នឹង​អាច​ទទួល​បាន​

ជោគជ័យ​ជាក់ជា​ មិន​ខាន​ឡើយ ព្រោះ​ពេល​នេះ​នាង​កំពុង​ប្រឹង​ឲ្យ​អស់​ពី​សមត្ថភាព​។ ប៉ុន្តែ​

យ៉ាង​ណា​នៅពេល​នេះ និសា បាន​ទទួល​ស្គាល់​ថា ការ​ហាត់​រាំ​របស់​នាង​នៅ​មាន​កម្រិត​នៅ​

ឡើយ។

នាង​បាន​និយាយ​ថា៖​«​ខ្ញុំ​ទទួល​ស្គាល់​ថា ការ​ហាត់​រាំ​របស់​ខ្ញុំ​នៅ​មាន​កម្រិត តែ​ខ្ញុំ​នឹង​ប្រឹង​បន្ត​»៕ 

ប្រភពពី៖ ខ្មែរស្ថាបនា