I love khmer news: ព័ត៌មានចោរប្លន់សម្លាប់ប្តី ការពិតសាច់ញាតិប្រពន្ធសម្លាប់ ក្រោយពីមានជម្លោះរវាងប្តី-ប្រពន្ធ

ត្តរតនគីរី ៖ អំពើប្លន់សម្លាប់ដ៏សាហាវនៅស្រុកបកែវ ដែលកោះសន្ដិភាពបានចុះផ្សាយមួយលេខរួចហើយ កាលពីថ្ងៃទី៣ មករា ជុំវិញករណីប្លន់សម្លាប់ជនជាតិទំពួន កាលពីថ្ងៃទី១ មករា វេលាម៉ោង៧និង៣០នាទីយប់នៅក្នុងភូមិត្រុំ ឃុំទ្យាមិញ ស្រុកបកែវ គឺធ្វើឱ្យមានការភ្ញាក់ផ្អើលយ៉ាងខ្លាំង ។ អ្វីដែលមានការកត់សម្គាល់នោះ គឺបុរសជាប្ដីត្រូវបានឃាតករកាប់ស្លាប់ រីឯប្រពន្ធបែរជារួចផុតពីសេចក្ដីស្លាប់ និងបានអះអាថា បានប្រវាយប្រតប់ និងខាំចោរទាំងនោះហើយរត់ចូលព្រៃ ។

បន្ទាប់ពីមានការស៊ើបអង្កេតយ៉ាងយកចិត្ដទុកដាក់ ពីសមត្ថកិច្ចជុំវិញអំពើប្លន់សម្លាប់នេះ បានរកឃើញថា មិនមែនក្រុមចោរសម្លាប់ទេ ឃាតកម្មនេះគឺកើតឡើងដោយសារហិង្សារវាងប្ដីនិងប្រពន្ធ ដោយសារតែស្រ្ដីជាប្រពន្ធបានឱ្យខ្សែកមាស២ជី និងប្រាក់១៥ម៉ឺុនរៀលទៅបងប្អូនខាងខ្លួនខ្ចី ហើយបុរសជាប្ដីដែលចង់បានម៉ូតូថ្មីជិះចេះតែរអ៊ូរទាំ ទីបំផុតក៏មានជម្លោះរវាងប្ដីប្រពន្ធតែម្ដង ។ មន្ដ្រីនគរបាលស្រុកបកែវបានឱ្យដឹងថា ជនរងគ្រោះឈ្មោះ ទីង លូឃា អាយុ ៥៥ឆ្នាំ និងប្រពន្ធឈ្មោះ រមាម នីន អាយុ ៥០ឆ្នាំ រស់នៅតែ២នាក់ប្ដីប្រពន្ធ អត់មានកូនទេ និងមានមុខរបរធ្វើចម្ការដាំស្វាយចន្ទីជាង១០ហិកតា ។ ក្រោយពីសមត្ថកិច្ចជំនាញធ្វើការស៊ើបអង្កេតចំពោះករណីខាងលើអស់ រយៈពេលជាច្រើនថ្ងៃមក និងផ្អែកតាមការបំភ្លឺរបស់ស្រ្ដីជាប្រពន្ធដែលប្រាប់សមត្ថកិច្ច នោះឃើញថា មិនមែនជាអំពើប្លន់សម្លាប់ទេ គឺប្រពន្ធនិងបក្សពួកក្រុមគ្រួសាររបស់ខ្លួនជាអ្នកសម្លាប់ ដោយសារស្រ្ដីជាប្រពន្ធបានឱ្យខ្សែកមាសទម្ងន់២ជី និងលុយខ្មែរ១៥ម៉ឺុនរៀលឱ្យបងប្អូនខាងខ្លួនខ្ចី ហើយនៅព្រឹកថ្ងៃទី៩ មករា នគរបាលស្រុកបកែវក៏បានកោះ ហៅប្រពន្ធទៅសាកសួរ ទើបដឹងថា ស្រ្ដីជាប្រពន្ធគឺជាជនសង្ស័យដោយសារការនិយាយខុសទៅនឹងវត្ថុតាង ព្រមទាំងសាក្សី និងការធ្វើកោសល្យវិច័យពេទ្យដោយដងខ្លួនសពមានស្នាមកាប់ចំគុម្ព ត្រចៀកខាងឆ្វេងជម្រៅ៤ហ៊ុនកន្លះ និងមានស្នាមខ្ចៅម្រាមដៃខ្ញាំចំភ្លៅខាងស្ដាំ និងដៃខាងឆ្វេងមានខ្ចៅម្រាមដៃខ្ញាំ និងម្រាមចង្អុលដៃខាងស្ដាំមានស្នាមធ្មេញខាំ ដែលបង្ហាញថា មុនពេលជនរងគ្រោះស្លាប់មានការប្រវាយប្រតប់គ្នា។ ដោយឡែក ប្រពន្ធបានឆ្លើយប្រាប់ប៉ូលិសថា ពេលចោរធ្វើសកម្មភាពនោះគាត់បានខាំចោរ និងខ្ញាំចោររបួសជាច្រើនកន្លែង ។

មន្ដ្រីសមត្ថកិច្ចបានសន្និដ្ឋានថា ពិតជាប្រពន្ធខាំប្ដី ខណៈពេលមានការប្រទូស្ដរ៉ាយគ្នា និងមានបក្សពួកខាងប្រពន្ធ២ទៅ៣នាក់ទៀតមកជួយ ក៏សម្លាប់បុរសជាប្ដីតែម្ដង ។ នៅថ្ងៃទី៩ មករា សមត្ថកិច្ចបានហៅស្រ្ដីជាប្រពន្ធមកកាន់អធិការដ្ឋានដើម្បីសួរ ចម្លើយ ស្រាប់តែត្រូវសាច់ញាតិបងប្អូនខាងប្រពន្ធ៣ទៅ៤នាក់លើកគ្នាមក កាន់អធិការដ្ឋាន ហើយរំដោះស្រ្ដីជាប្រពន្ធដែលជាជនសង្ស័យទៅដោយសុវត្ថិភាព ។ លោកអធិការបញ្ជាក់ថា រឿងនេះពិតជាប្រពន្ធបានឃុបឃិតគ្នាជាមួយសាច់ញាតិសម្លាប់ប្ដីរបស់ ខ្លួន ដោយសារតែការរអ៊ូរទាំរឿងឱ្យមាស និងលុយកាក់ទៅបងប្អូនខ្ចី ទើបទ្រាំនឹងការរអ៊ូរទាំលែងបានក៏ក្លាយជាជម្លោះរហូតដល់សម្លាប់ បុរសជាប្ដី ហើយក្លែងថា មានចោរប្លន់ទៅវិញ ។

លោក ជា សុភ័ក្រ្ដ ព្រះរាជអាជ្ញារងអមសាលាដំបូងខេត្ដបានឱ្យដឹងថា រឿងនេះសមត្ថកិច្ចត្រូវការស៊ើបអង្កេតបន្ដទៀត ដើម្បីប្រមូលវត្ថុតាងឱ្យគ្រប់គ្រាន់ដើម្បីឈានទៅចាប់ខ្លួនប្រពន្ធ និងបក្សពួក ហើយករណីនេះមិនមែនជារឿងប្លន់ទ្រព្យសម្បត្ដិទេ គឺជាអំពើហិង្សាក្នុងគ្រួសារ ៕

ប្រភពពី៖ កោះសន្តិភាព