ជុំវិញការប្រកាសលទ្ធផល ដោយមិនបានដោះស្រាយ ភាពមិនប្រក្រតីតាមសំណើ របស់គណបក្សសង្គ្រោះជាតិ នាំឲ្យស្ថានទូតអាមេរិកប្រចាំកម្ពុជា សម្តែងការព្រួយបារម្ភ នឹងលទ្ធបោះឆ្នោត ដែលត្រូវបានប្រកាសដោយ គជប នៅព្រឹកថ្ងៃអាទិត្យនេះ ដោយលើកឡើងពី សេចក្តីរាយការណ៍ នៃភាពមិនប្រក្រតីមួយចំនួននៃការបោះឆ្នោត ។ គណបក្សសង្គ្រោះជាតិ បានច្រានចោល លទ្ធផលបោះឆ្នោត ដែលប្រកាសដោយ គជប ដោយលើកឡើងថា លទ្ធផលនេះ ត្រូវបានរៀបចំ ដោយគណបក្ស ប្រជាជនកម្ពុជា និងត្រូវបានប្រថាប់ត្រា ដោយ គជប និងក្រុមប្រឹក្សាធម្មនុញ្ញ។
លោក សៀន ម៉ាកគិនតូស អ្នកនាំពាក្យរបស់ ស្ថានទូតអាមេរិក បានប្រាប់អ្នករាយការណ៍ព័ត៌មានថា សហរដ្ឋអាមេរិក នៅតែព្រួយបារម្ភ ពីការរាយការណ៍ នៃភាពមិនប្រក្រតីធ្ងន់ធ្ងរ នៃដំណើរការបោះឆ្នោត ហើយនៅតែអំពាវនាវ ឲ្យមានការស៊ើបអង្កេត ពេញលេញ និងមានតម្លាភាព ទៅលើភាពមិនប្រក្រតីទាំងឡាយ ដើម្បីឲ្យអ្នកបោះឆ្នោត អាចទុកចិត្តបាន។ លោកបន្តថា សហរដ្ឋអាមេរិក អំពាវនាវឲ្យគ្រប់គណបក្សទាំងអស់ ចាប់យកឱកាសនេះ ដើម្បីអនុវត្តកំណែទម្រង់ តាមប្រជាធិបតេយ្យ ដ៏មានន័យ ពង្រឹងនីតិរដ្ឋ និងបង្កើនការគោរពសិទ្ធិមនុស្ស។
គណបក្សសង្គ្រោះជាតិ ក៏បានព្រមាន ធ្វើមហាបាតុកម្ម ទ្រង់ទ្រាយធំ និងខ្លាំងក្លាជាងមុន រយៈពេលបីថ្ងៃ គឺចាប់ពីថ្ងៃទី ១៥ ដល់ទី ១៧ ខែកញ្ញា ដោយប្រជាជន មិនត្រឡប់ទៅផ្ទះនោះទេ។ គណបក្សសង្គ្រោះជាតិ លើកឡើងថា បាតុកម្មនោះ គឺដើម្បីទាមទារ ឲ្យមានការបង្កើត គណៈកម្មការឯករាជ្យ ដោយមិនមានវត្តមាន គជប។ គណបក្សសង្គ្រោះជាតិ ក៏បានព្រមានធ្វើពហិការចូលរួមប្រជុំសភា លើកដំបូង ដែលនឹងធ្វើឲ្យ រដ្ឋាភិបាលកម្ពុជា មិនត្រូវបានទទួលស្គាល់ និងមិនស្របតាម សន្ធិសញ្ញាទីក្រុងប៉ារីស៕
ប្រភពពី៖ ខេមបូឌាផេក
No comments:
Post a Comment