 |
| រូបថតអ្នកនាង ឈិន សុរ៉ាវី កាលនៅរស់ |
មកទល់ម៉ោងនេះ នៅមិនទាន់ដឹងពីមូលហេតុ ដែលបណ្ដាលឲ្យអ្នកនាងឈិន សុរ៉ាវី ដែលមានឈ្មោះដើមថា ឈិន ចាន់សុរ៉ាវី ដែលជាតារាចម្រៀងល្បីឈ្មោះមួយរូប និងត្រូវជាបងស្រីបង្កើតរបស់កញ្ញាឈិន សុធារី ចងកសម្លាប់ខ្លួននៅឡើយទេ។ សូម្បីកញ្ញាឈិន សុធារីខ្លួនឯង ក៏បដិសេធក្នុងការអត្ថាធិប្បាយ ពាក់ព័ន្ធនឹងមរណភាពរបស់បងស្រីក្នុងពេលនេះដែរ។
ក្រុមមន្ត្រីមានសមត្ថកិច្ច បានត្រឹមត្រឹមតែសន្និដ្ឋានថា អ្នកនាងឈិន សុរ៉ាវី ដែលជាអ្នកចម្រៀងដ៏មានមុខមាត់ម្នាក់ ប្រចាំនៅក្នុងផលិតកម្មក្រៅស្រុក និងឧស្សាហ៍ឡើងទូរទស្សន៍ញឹកញាប់ សម្រេចចិត្តចងកសម្លាប់ ព្រោះតែមូលហេតុខូចចិត្ត និងតុកស៊ិចប៉ុណ្ណោះ។ ប៉ុន្តែនៅមិនទាន់មានការបញ្ជាក់ឡើយ ថាអ្វីជាមូលដ្ឋានដែលបណ្ដាលឲ្យតារាចម្រៀងដែលមានឈ្មោះបោះសំឡេងរូបនេះ ដាច់ចិត្តធ្វើអត្តឃាតខ្លួនឯង។ កញ្ញាឈិន សុធារី ដែលជាតារាចម្រៀង និងជាអតីតពិធីការិនីប្រចាំនៅប៉ុស្ដិ៍លេខ៥ បានអះអាងថា កញ្ញាមិនទាន់ចង់និយាយអ្វីនោះទេ ពាក់ព័ន្ធនឹងការបាត់បង់ជីវិតរបស់បងស្រី ដែលកំពុងធ្វើឲ្យកញ្ញា និងសាច់ញាតិរំជួលចិត្តយ៉ាងពេញទំហឹងគ្រប់គ្នា។ ដូចគ្នានឹងការចោទសួរ ពីសំណាក់អ្នកកាសែត កញ្ញា ក៏ថ្លែងប្រាប់មិត្តភ័ក្ត្រក្នុងពិភពសិល្បៈថា មិនគួរណាបងស្រីខ្លួនដាច់ចិត្តធ្វើរឿងបែបហ្នឹងសោះ ដោយមិនប្រាប់ថា នោះជារឿងអ្វី។
អ្នកនាងឈិន សុរ៉ាវី បានចងក សម្លាប់ខ្លួន កាលពីយប់ថ្ងៃទី១៤ វិច្ឆិកា នៅវេលាម៉ោង៧ និង៣០យប់ នៅក្នុងបន្ទប់ឡៅតឿរបស់ខ្លួន នៅក្នុងផ្ទះល្វែងលេខ២១៤ ស្ថិតនៅផ្លូវដេ ភូមិក្រាំងអង្រង សង្កាត់ក្រាំងធ្នង់ ក្នុងខណ្ឌពោធិ៍សែនជ័យ ។ អ្នកនាងមានវ័យជាង៣០ ឆ្នាំ និងធ្លាប់ប្រឡូកជាតារាចម្រៀងតាំងពីមុនជំនាន់កញ្ញាឈិន សុធារីម្ល៉េះ ដោយគ្រាន់តែអ្នកនាងហាក់ទទួលបានប្រជាប្រិយភាពល្បីល្បាញចាញ់ប្អូនស្រីរបស់ខ្លួន ព្រោះតែឈិន សុធារី មានជំនាញខាងផ្នែកពិធីការិនី និងមានឱកាសលោតខ្លាំងជាងក្នុងសិល្បៈនោះតែប៉ុណ្ណោះ។ នៅក្បែរសពរបស់អ្នកនាង គេឃើញមានសំបុត្រមួយច្បាប់ ដែលសរសេរបញ្ជាក់ពីការឈឺចិត្តរបស់អ្នកនាង ប៉ុន្តែពិបាកមើល ដែលទំនងមកអ្នកនាងបានសរសេរដោយមិនមានស្មារតីពេញលេញ។ សំបុត្រនោះ បញ្ជាក់ថា នឹងមិនលើកលែងចំពោះមនុស្សដែលបានធ្វើឲ្យអ្នកនាងឈឺចាប់នោះឡើយ ខណៈបុគ្គលនោះ គេនៅមិនដឹងសោះថា ជាសាច់ញាតិ មិត្តភ័ក្ត្រ ឬជាកំណាន់ចិត្ត ដែលអ្នកនាងខំលាក់ទស្សនិកជនកន្លងមក។ យ៉ាងណាមិញ សេចក្ដីសន្និដ្ឋានចុងក្រោយ គេជឿថា ហេតុផលនៃការស្លាប់នោះ គឺជារឿងស្នេហា ត្បិតករណីចង់ធ្វើអត្តឃាតខ្លួនឯងបែបនេះ ត្រូវគេដឹងថា អ្នកនាងឈិន សុរ៉ាវី ធ្លាប់ប៉ុនប៉ងធ្វើចំពោះខ្លួនឯងម្ដងជាពីរម្ដងកាលពីលើកមុនហើយ ដោយគ្រាន់តែកាលនោះ មិនបានសម្រេចតែប៉ុណ្ណោះ។
ប្រភពពីសាច់ញាតិដែលរស់នៅជាមួយ បានអះអាងថា មុនមានហេតុការណ៍ចងករសម្លាប់ខ្លួននេះ អ្នកនាងឈិន សុរ៉ាវី បានបង្ហាញកាយវិការតុកស៊ិចហួសប្រមាណ ដោយមិនព្រមនិយាយស្ដី សម្ដែងទឹកមុខអស់សង្ឃឹម និងបានបើករថយន្តទៅបុកបង្គោលភ្លើង នៅពេលព្រឹកក្នុងថ្ងៃកើតហេតុនោះផង។ អ្នកនាងគិតតែអង្គុយយំ និង ផឹកស្រាប៊ៀអស់៤កំប៉ុង មុនពេលឡើងទៅកាន់បន្ទប់ឡៅតឿនៅពេលព្រលប់។ គ្រប់ៗគ្នាជឿថា បុគ្គលដែលបណ្ដាលឲ្យអ្នកនាងឈិន សុរ៉ាវី ឈឺចិត្តរហូតដាច់ចិត្តសម្លាប់ខ្លួននេះ ពិតជាសាច់ញាតិរបស់សពដឹងច្បាស់ ដោយគ្រាន់តែម្នាក់ៗ មិនព្រមសហការក្នុងការបញ្ជាក់ប្រាប់ភ្លាមៗនោះតែប៉ុណ្ណោះ។ លោកប៊ន សំអាត អធិការនគរបាល ខណ្ឌពោធិ៍សែនជ័យ បានប្រាប់បណ្ដាញផ្សព្វផ្សាយនានាថា ក្រោយធ្វើកោសល្យវិច័យ ជនរងគ្រោះពិតជាស្លាប់ដោយចងកសម្លាប់ខ្លួនមែន។ មកទល់ពេលនេះ ក្រុមសមត្ថកិច្ចចម្រុះរបស់លោក កំពុងស្រាវជ្រាវបន្តដើម្បីឲ្យច្បាស់ថា អ្វីជាមូលហេតុដែលនាំឲ្យតារាចម្រៀងម្នាក់នេះ សម្លាប់ខ្លួន។
ការបាត់បង់ជីវិតរបស់ឈិន សុរ៉ាវី គឺជារឿងដ៏សោកស្ដាយមួយ ខណៈដែលមនុស្សភាគច្រើនបានបន្ទោសថា ហេតុអ្វីបានជាអ្នកនាងគិតខ្លី ព្រោះតែហេតុផលមនុស្សម្នាក់ធ្វើបាប។ នេះមិនមែនករណីស្លាប់តារាសិល្បៈលើកទី១នៅកម្ពុជានោះទេ ប៉ុន្តែវាករណីធ្វើអត្តឃាតលើកដំបូងសម្រាប់ឆ្នាំ២០១៣នេះ សម្រាប់តារាចម្រៀងដែលមានឈ្មោះបោះសំឡេងក្នុងពិភពសិល្បៈ៕
ប្រភពពី៖ VOD
No comments:
Post a Comment