 |
| សមត្ថកិច្ចបង្ក្រាបការតវ៉ារបស់កម្មករ (រូបថត តាត ឧត្តម) |
គណបក្សសង្គ្រោះជាតិ នៅថ្ងៃអង្គារនេះ ថ្កោលទោសកម្លាំងសមត្ថកិច្ច ដែលប្រើអំពើហិង្សាបង្ក្រាបកម្មករ រោងចក្រSL រហូតធ្វើឲ្យស្ត្រីម្នាក់ដែលមិនមែនជាកម្មករ ស្លាប់ និងមួយចំនួនទៀត រងរបួស នៅម្តុំស្ពានស្ទឹងមានជ័យ។
នៅព្រឹកថ្ងៃអង្គារនេះ កម្មករជាង១ពាន់នាក់ ភាគច្រើនជាបុរស មកពីរោងចក្រSL ដែលមានទីតាំងនៅសង្កាត់បឹងទំពុន ខណ្ឌមានជ័យ គ្រោងហែក្បួនទៅកាន់ផ្ទះលោកនាយករដ្ឋមន្ត្រី ហ៊ុន សែន នៅក្បែរវិមានឯករាជ្យ ប៉ុន្តែ ក្បួនដង្ហែនេះ ត្រូវបានរារាំងត្រង់ចំណុចស្ពានស្ទឹងមានជ័យ ត្រើយខាងលិច ដោយកម្លាំងសមត្ថកិច្ចប្រមាណ៣០០ នាក់ ប្រដាប់ដោយខែល និងដំបងឆក់។ ការរារាំងនេះ រហូតធ្វើឲ្យមានការប៉ះទង្គិចគ្នា។
សេចក្តីថ្លែងការណ៍របស់គណបក្សសង្គ្រោះជាតិ ចេញផ្សាយនៅថ្ងៃអង្គារនេះ ឲ្យដឹងថា គណបក្សសង្គ្រោះជាតិ សោកស្តាយចំពោះព្រឹត្តិការណ៍នៃការប្រើហិង្សាពីសំណាក់អាជ្ញាធរ ដោយគ្រាន់តែកម្មករ ដង្ហែក្បួនបាតុកម្មដោយសន្តិវិធី ដើម្បីទាមទារថៅកែរោងចក្រគោរពច្បាប់ការងារ និងអនុវត្តកិច្ចសន្យា ដែលបានព្រមព្រៀងកន្លងមក។ គណបក្សសង្គ្រោះជាតិ អំពាវនាវឲ្យអាជ្ញាធស្វែងរកដំណោះស្រាយដោយសន្តិវិធី។
ក្នុងហេតុការណ៍នៅស្ទឹងមានជ័យនោះ ស្នងការនគរបាលរាជធានីភ្នំពេញ លោក ជួន សុវណ្ណ បានចេញឲ្យមានការបង្ក្រាបលើក្រុមកម្មករ ដោយសារស្ថានភាពតានតឹង។បន្ទាប់ពីហេតុការណ៍នៃការប៉ះទង្គិចគ្នានេះ លោក ជួន សុវណ្ណ ឲ្យដឹងថា លោកសោកស្តាយ ដែលក្រុមកម្មករ មិនបានអនុវត្តបាតុកម្មរបស់ខ្លួនដោយសន្តិវិធី និងបានធ្វើឲ្យសមត្ថកិច្ចជាច្រើននាក់រងរបួស។
ការតវ៉ារបស់កម្មករ គឺដើម្បីទាមទារឲ្យដកប្រធានរដ្ឋបាលរោងចក្រ លោក មាស សុថា សុំឲ្យដកកម្លាំងសមត្ថកិច្ចចម្រុះចេញពីបរិវេណរោងចក្រ និងផ្តល់ប្រាក់ឈ្នួលដល់កម្មករអំទ្បុងបាតុកម្មរយៈបីខែជាដើម។កាលពីថ្ងៃទី២២ ខែតុលា ឆ្នាំ២០១៣ កម្មកររោងចក្រនេះ បានហែក្បួន មកផ្ទះលោកនាយករដ្ឋមន្ត្រី ហ៊ុន សែន សុំអន្តរាគមន៍។ ប៉ុន្តែពួកគេត្រូវបានកម្លាំងសមត្ថកិច្ចបង្ក្រាប បណ្តាលឲ្យស្ត្រីមួយចំនួនរងរបួស៕
ប្រភពពី៖ VOD
No comments:
Post a Comment