 |
លោកប្រធានាធិបតីចិន ស៊ី ជីនពីង
REUTERS/Jason Lee
|
នៅថ្ងៃសុក្រ ទី១៥ វិច្ឆិកាម្សិលមិញ រដ្ឋាភិបាលនៃប្រទេសចិនបានប្រកាសឲ្យដឹងនូវវិធានការកំណែទម្រង់មួយ ចំនួនមិនធ្លាប់មានទេក្នុងរយៈពេល ២០ឆ្នំាចុងក្រោយនេះ។ ក្រៅពីផ្នែកសេដ្ឋកិច្ច វិធានការកំណែទម្រង់ក៏បានផ្តោតសំខាន់លើនយោបាយកូនទោល ការកាត់បន្ថយទោសប្រហារជីវិត និងការបំបាត់ចោលទំាងស្រុងនូវជំរំលត់ដំការងារ។ វិធានការកំណែទម្រង់នេះត្រូវបានសម្រេច និងអនុម័តដោយថ្នាក់ដឹកនំាចិននៅក្នុងកិច្ចប្រជុំពេញអង្គនៃ គណៈកម្មាធិការមជ្ឈិមបក្សកុម្មុយនិស្តកាលពីដើមសប្តាហ៍នេះ។
វិធានការកំណែទម្រង់នយោបាយដែលរដ្ឋាភិបាលចិនបានផ្សព្វផ្សាយឲ្យដឹង កាលពីថ្ងៃសុក្រ ទី១៥ វិច្ឆិកាម្សិលមិញ គឺជាអត្ថបទជាភាសាចិនដ៏វែងអន្លាយមួយ មានជាង ២០ ០០០តួអក្សរ និងដែលចុះផ្សាយដោយកាសែតចិនស៊ីនហួរ។ នេះជាវិធានការកំណែទម្រង់មួយដែលគេមិនធ្លាប់ឃើញមាននៅក្នុងប្រទេស ចិនទេ ក្នុងរយៈពេលជាង ២ទសវត្សកន្លងទៅ និងដែលជាមហិច្ឆតារបស់លោកប្រធានាធិបតិថ្មីចិន គឺលោកស៊ី ជីនពីងដែលទើបបានចូលកាន់តំណែងកាលពី ១ឆ្នំាកន្លងទៅ។
និយាយពីវិធានការកំណែទម្រង់លើវិស័យសេដ្ឋកិច្ច រដ្ឋាភិបាលចង់កាត់បន្ថយតួនាទីកាន់កាប់សេវាសាធារណៈផ្តាច់មុខរបស់ ខ្លួន ដោយទុកឲ្យមានការចូលរួមប្រកួតប្រជែងពីវិស័យឯកជន។ ជាមួយនឹងវិធានការថ្មី ក្រុមហ៊ុន រោងចក្រសហគ្រាសចំនួន ១១៣ រាប់ចាប់តំាងពីវិស័យថាមពល រហូតដល់វិស័យហិរញ្ញវត្ថុ និងដឹកជញ្ជូនដែលសព្វថ្ងៃកំពុងស្ថិតក្រោមការគ្រប់គ្រងរបស់ រដ្ឋាភិបាល និងគ្មានគូប្រជែង នឹងត្រូវចេះរកស៊ីគ្រប់គ្រងដោយខ្លួនឯង ប្រឈមនឹងគូប្រជែងឯកជន។ កន្លងមក ក្រុមហ៊ុន រោងចក្រសហគ្រាសទំាងនេះបានទទួលការចោទប្រកាន់ពីការកិបកេងលុយរដ្ឋ និងការបម្រើសេវាគ្មានប្រសិទ្ធិភាព។
ជាមួយនឹងវិធានការថ្មី ក្រុមហ៊ុន រោងចក្រសហគ្រាសទំាងនេះនឹងត្រូវបង់ប្រាក់ចំណេញចំនួន ៣០% ឲ្យរដ្ឋាភិបាលចាប់ពីឆ្នំា ២០២០ ទៅ ហើយលុយនេះនឹងត្រូវរដ្ឋបញ្ចូលទៅក្នុងហិបរបស់ក្រុមហ៊ុនធានា រ៉ាប់រងសង្គម។ ក្រៅពីនោះ វិធានការកំណែទម្រង់ក៏គ្រោងនឹងកាត់បន្ថយចំនួនបុគ្គលិករដ្ឋ និងការចំណាយមិនចំាបាច់មួយចំនួន។ ចំណែកការចំណាយរបស់រដ្ឋក៏នឹងត្រូវអនុញ្ញាតឲ្យមានការចូលរួមពី វិស័យឯកជនដែរ ពិសេសធនាគារឯកជន។
ហេតុអ្វីបានជារដ្ឋាភិបាលបន្ធូរបន្ធយនយោបាយកូនទោល?
ច្បាប់ផែនការគ្រួសារដែលអនុញ្ញាតឲ្យគ្រួសារមួយមានកូនតែមួយត្រូវ បានអនុម័តជាផ្លូវការកាលពីដំណាច់ទសវត្សឆ្នំា ៧០។ មូលហេតុនៃការបង្កើតឲ្យមានច្បាប់នេះឡើង គឺដើម្បីងាយស្រួលគ្រប់គ្រងប្រជាពលរដ្ឋដែលមានច្រើនជាងគេក្នុង ពិភពលោក។ មួយវិញទៀត រដ្ឋាភិបាលតែងតែបានអះអាងថា គឺនយោបាយកូនទោលនេះហើយដែលអនុញ្ញាតឲ្យចិនទទួលបានកំណើនសេដ្ឋកិច្ច រហូតដល់សព្វថ្ងៃ និងថា នយោបាយកូនទោលបានរារំាងកំណើតទារកចំនួន ៤០០លាននាក់ក្នុងរយៈពេល ៤៣ឆ្នំាចុងក្រោយនេះ។ តែកន្លងមក និងបើយោងតាមក្រុមអ្នកការពារច្បាប់ នយោបាយកូនទោលបានបណ្តាលឲ្យមានស្រ្តីជាច្រើនបង្ខំចិត្តរម្លូតកូន ចោល ពិសេសស្រ្តីគ្មានរៀបការ ឬមួយក៏គូស្រករដែលមិនទាន់គ្រប់អាយុរៀបការជាដើម ២០ឆ្នំាសម្រាប់នារី និង ២២ឆ្នំាសម្រាប់បុរស។
មានកត្តាសំខាន់ពីរដែលបានជម្រុញរដ្ឋាភិបាលឲ្យបន្ធូរបន្ធយនយោបាយ កូនទោលនេះ គឺការធ្លាក់ចុះនៃចំនួនមនុស្សក្នុងអាយុធ្វើការ និងការកើនឡើងនៃចំនួនមនុស្សចាស់។ ចំនួនមនុស្សក្នុងអាយុធ្វើការបានធ្លាក់ចុះជិត ៣លាន ៥សែននាក់ក្នុងឆ្នំា ២០១២ ពោលធ្លាក់មកនៅត្រឹមតែ ៩៣៧នាក់ប៉ុណ្ណោះ។ ចំណែកអត្រានៃចំនួនមនុស្សចាស់ មានរហូតដល់ ១៤,៣% នៃចំនួនប្រជាពលរដ្ឋចិនទំាង ១ ៣៥០លាននាក់ ពោលគឺមាន ៣ដង ច្រើនជាងកាលពីឆ្នំា ១៩៨២។
ក៏ប៉ុន្តែ នយោបាយថ្មីអនុញ្ញាតឲ្យគ្រួសារមួយអាចយកកូនពីរបានត្រូវតែគោរព លក្ខខណ្ឌមួយ នោះគឺឳពុក ឬមួយក៏ម្តាយត្រូវតែជាកូនទោល។ នៅក្នុងច្បាប់ចាស់ គ្រួសារមួយអាចយកកូនពីរបាន លុះត្រាណាតែឳពុក និងម្តាយជាកូនទោលទំាងពីរនាក់។ យ៉ាងណាក៏ដោយ គ្រួសារណាដែលជាក្រុមជនជាតិភាគតិច និងប្រជាកិសករ ហើយដែលកូនដំបូងជាកូនស្រី មិនមានជាប់ពាក់ព័ន្ធនឹងច្បាប់ថ្មីនេះទេ។
លប់បំបាត់ជំរំលត់ដំការងារដើម្បីរំងាប់កំហឹងរបស់សាធារណៈជន
ជំរំលត់ដំការងារត្រូវបានបង្កើតឡើងនៅក្នុងជំនាន់លោកម៉ៅ សេទុងកាលពីឆ្នំា ១៩៥៧។ គោលដៅ គឺទុកសម្រាប់ដាក់ជនណាដែលបានប្រព្រឹត្តិបទល្មើសកម្រិតស្រាល។ តែក្រុមអ្នកប្រឆំាងបានអះអាងថា ជំរំនោះក៏ត្រូវបានរដ្ឋអំណាចប្រើសម្រាប់ឃុំឃំាងអ្នកដែលបាននិយាយ រិះគន់ ទិតៀនរដ្ឋាភិបាលដែរ។ របាយការណ៍ចេញផ្សាយដោយអង្គការសហប្រជាជាតិក្នុងឆ្នំា ២០០៩ ឲ្យដឹងថា មានអ្នកទោសប្រមាណជា ១៩០ ០០០នាក់កំពុងជាប់ឃុំនៅក្នុងជំរំនោះ។
មូលហេតុដែលជម្រុញរដ្ឋាភិបាលឲ្យបិទជំរំនោះ គឺដើម្បីរំងាប់កំហឹង និងការ រិះគន់ ទិតៀនពីសំណាក់មជ្ឈដ្ឋានសាធារណៈជនទូទៅ។ រិះគន់ពីរបៀបគ្រប់គ្រងគ្មានតម្លាភាព ក៏ដូចជាការចាប់បញ្ជូនជនល្មើសទៅឃុំឃំាងដោយមិនបានឆ្លងកាត់ការ កាត់ទោសត្រឹមត្រូវ។
នៅក្នុងគម្រោងលប់ចោលជំរំលត់ដំការងារទំាងអស់ រដ្ឋាភិបាលមិនបានលំអិតពីការប្តូរទៅជាជំរំអ្វីទេ ហើយក៏នៅមិនទាន់បានលំអិតអំពីជោគវាសនាអ្នកទោសទំាងអស់ដែលកំពុង ស្ថិតក្នុងជំរំនោះដែរ។ តែកន្លងមក មានជំរំលត់ដំការងារខ្លះបានប្តូរឈ្មោះទៅជា ជំរំកែប្រែអកប្បកិរិយាខុសច្បាប់ ដោយការអប់រំ។ តែគេនៅមិនអាចដឹងទេថា តើនឹងមានការខុសគ្នាអ្វីខ្លះ រវាងជំរំលត់ដំការងារ និង ជំរំកែប្រែអកប្បកិរិយាខុសច្បាប់ ដោយការអប់រំនោះ៕
ប្រភពពី៖ ខេមរភាសា
No comments:
Post a Comment