 |
| លោកនាយករដ្ឋមន្ត្រី ហ៊ុន សែន (ឆ្វេង) និងនាយករដ្ឋមន្ត្រីជប៉ុន លោក ស៊ិនហ្សូ អាបេ (Sinthu ABE) ក្នុងជំនួបទ្វេភាគីនាទីស្ដីការគណៈរដ្ឋមន្ត្រី នៅថ្ងៃទី១៦ ខែវិច្ឆិកា ឆ្នាំ២០១៣។ |
លោកនាយករដ្ឋមន្ត្រី ហ៊ុន សែន បានស្នើដល់ប្រមុខរដ្ឋាភិបាលជប៉ុន ដែលកំពុងបំពេញទស្សនកិច្ចផ្លូវការរយៈពេល ២ថ្ងៃនៅកម្ពុជា ថា កម្ពុជា ពិតជាត្រូវជាចាំបាច់ក្នុងការកែទម្រង់លើប្រព័ន្ធបោះឆ្នោត ក្នុងអាណត្តិបន្ទាប់ទៀតនេះ ក្នុងការពន្លឿនឲ្យបានស៊ីជម្រៅបន្ថែមទៀតលើគុណភាព ក្នុងដំណើរការនៃការបោះឆ្នោតឲ្យបានប្រសើរនៅកម្ពុជា។
ការថ្លែងដូចនេះរបស់ លោក ហ៊ុន សែន ធ្វើឡើងក្នុងជំនួបទ្វេភាគីនៅថ្ងៃទី១៦ វិច្ឆិកា នាទីទីស្ដីការគណៈរដ្ឋមន្ត្រី ជាមួយនាយករដ្ឋមន្ត្រីជប៉ុន គឺ លោក ស៊ិនហ្សូ អាបេ (Sinthu ABE)។ លោក ហ៊ុន សែន រំពឹងថា ដំណើរការបោះឆ្នោតដែលនឹងប្រព្រឹត្តទៅក្នុងពេលខាងមុខនេះ នឹងបានប្រសើរជាងបច្ចុប្បន្ន។ អ្វីដែលលោកនាយករដ្ឋមន្ត្រី ហ៊ុន សែន គិតថា នីតិវិធីបោះឆ្នោតក្នុងនីតិកាលបន្ទាប់ អាចកែប្រែបានល្អជាងនេះ ព្រោះតែប្រទេសជប៉ុន គឺជាប្រទេសដែលអនុវត្តគោលនយោបាយប្រជាធិបតេយ្យ អាចជឿទុកចិត្តបាន ជាពិសេស កម្ពុជា ត្រូវការជាចាំបាច់ក្នុងការកែទម្រង់គោលនយោបាយលើប្រព័ន្ធបោះ ឆ្នោតនេះ។
លោក ហ៊ុន សែន បញ្ជាក់ថា នេះជាលើកទីមួយដែលកម្ពុជា ទាមទារឲ្យមានអ្នកជំនាញការអន្តរជាតិជួយបង្កើនសមត្ថភាព និងបច្ចេកទេសដល់កម្ពុជា លើប្រព័ន្ធបោះឆ្នោត។
ថ្លែងសារនយោបាយក្រោយជំនួបបិទទ្វារ នាយករដ្ឋមន្ត្រីជប៉ុន លោក ស៊ិនហ្សូ អាបេ ឲ្យដឹងតាមរយៈអ្នកបកប្រែថា ប្រទេសជប៉ុន ស្វាគមន៍ចំពោះការស្នើរបស់កម្ពុជា នៅពេលនេះ។
បើទោះជាយ៉ាងក៏ដោយចុះ គណបក្សសង្គ្រោះជាតិ ចាត់ទុកថា រដ្ឋាភិបាលបច្ចុប្បន្ននឹងមិនអាចដំណើរការបានទៅមុខទៀតឡើយ ក្នុងគោលនយោបាយកែទម្រង់របស់ខ្លួននោះ។ ប្រាំថ្ងៃក្រោយបន្ទាប់ពីមានផ្ទុះហិង្សានៅគល់ស្ពានស្ទឹងមានជ័យ រវាងកម្មកររោងចក្រ អែស.អិល (SL Factory) និងក្រុមសមត្ថកិច្ចចម្រុះរបស់រដ្ឋាភិបាល ដែលបណ្ដាលឲ្យមានស្លាប់ និងរបួស។
លោក កឹម សុខា អនុប្រធានគណបក្សសង្គ្រោះជាតិ ដែលបានចុះជួបព្រះសង្ឃ និងគ្រួសាររងរបួសក្នុងព្រឹត្តិការណ៍ កាលពីថ្ងៃទី១២ វិច្ឆិកា និយាយនៅថ្ងៃទី១៦ វិច្ឆិកា ថា គណបក្សប្រជាជនកម្ពុជា បើទោះជាចង់កែទម្រង់បែបណា ក៏លែងដំណើរទៅមុខបានទៀតហើយនៅពេលនេះ។ លោក កឹម សុខា ចំអកឲ្យលោកនាយករដ្ឋមន្ត្រី ហ៊ុន សែន ថា ម្ដងជាពីរដង អនុប្រធានគណបក្សប្រជាជនកម្ពុជា នេះ តែងក្បត់កិច្ចសន្យារបស់ខ្លួនជាដរាប ដែលធ្លាប់ទាមទារឲ្យមានការកែទម្រង់គោលនយោបាយ។
ក្រៅពីទទួលសំណើរបស់កម្ពុជា ដែលស្នើសុំឲ្យប្រទេសជប៉ុន ជួយផ្ដល់អ្នកបច្ចេកទេស និងអ្នកសង្កេតការណ៍ដើម្បីកែទម្រង់លើប្រព័ន្ធបោះឆ្នោតនេះ ក្នុងដំណើរបំពេញទស្សនកិច្ចរយៈពេល ២ថ្ងៃ ចាប់ពីថ្ងៃទី១៦ ដល់ថ្ងៃទី១៧ លោក ស៊ិនហ្សូ អាបេ សន្យាថានឹងបន្តជ្រោមជ្រែងដល់កម្ពុជា ទៅលើវិស័យសំខាន់ៗបន្ថែមទៀត ដូចជា សុខាភិបាល អប់រំ នីតិរដ្ឋ ការវិនិយោគ សន្តិសុខក្នុងតំបន់ និងកិច្ចសហប្រតិបត្តិការសន្តិសុខអង្គការសហប្រជាជាតិ។
ចំណែកអង្គការសង្គមស៊ីវិល ដែលធ្វើការលើប្រព័ន្ធបោះឆ្នោត សាទរចំពោះកិច្ចខិតខំប្រឹងប្រែងរបស់រដ្ឋាភិបាលនៅពេលនេះ។ ប៉ុន្តែ សង្គមស៊ីវិលចាត់ទុកថា សំខាន់វាអាស្រ័យលើឆន្ទៈនយោបាយរបស់មេដឹកនាំប៉ុណ្ណោះ៕
ប្រភពពី៖ វិទ្យុអាស៊ីសេរី
No comments:
Post a Comment