 |
| លោក ចម ប្រសិទ្ធ អតីតរដ្ឋមន្ត្រីក្រសួងពាណិជ្ជកម្ម និងបច្ចុប្បន្នជារដ្ឋមន្ត្រីក្រសួងឧស្សាហកម្ម រ៉ែ និងថាមពល។ រូបថត ហុង មិនា |
លោក ជាម យៀប តំណាងរាស្រ្តគណបក្សប្រជាជនឲ្យដឹងកាលពីម្សិលមិញថា រដ្ឋាភិបាល នឹងស្នើសុំការអនុម័តពីរដ្ឋសភា ដើម្បីបំបែកក្រសួងទៅជាក្រសួងរ៉ែ និងថាមពល និងក្រសួងឧស្សាហកម្ម និងសិប្បកម្ម។
លោក យៀប បានបញ្ជាក់ថា៖ «ខណៈដែលឧស្សាហកម្មធម្មជាតិ និងសិប្បកម្ម[កំពុងរីកចម្រើន] ការផ្តោតលើឧស្សាហកម្ម មានការផ្លាស់ប្តូរ ដូច្នេះ រដ្ឋសភាត្រូវតែអនុម័ត[ការផ្លាស់ប្តូរ] អនុលោមតាមសំណើរបស់រដ្ឋាភិបាល»។
លោកបានបន្ថែមថា វាមិនទាន់ច្បាស់ទេ ថាតើលោក ចម ប្រសិទ្ធ រដ្ឋមន្រ្តីក្រសួងឧស្សាហកម្ម រ៉ែ និងថាមពលបច្ចុប្បន្ន នឹងកាន់ក្រសួងមួយណានោះ ប្រសិនបើមានគម្រោងផ្លាស់ប្តូរ ដែលសេចក្តីសម្រេចនេះចុងក្រោយ គឺត្រូវធ្វើឡើងដោយលោកនាយករដ្ឋមន្រ្តី ហ៊ុន សែន។
ការផ្លាស់ប្តូរនេះ មិនអាចមានការចូលរួមពីគណបក្សប្រឆាំង ក្នុងសម័យប្រជុំរដ្ឋសភា ដែលនឹងចាប់ផ្តើមនៅថ្ងៃស្អែកនេះទេ។ តំណាងរាស្រ្តគណបក្សប្រជាជន បានចូលកាន់អាសនៈរបស់ខ្លួន ក្នុងរដ្ឋសភាកាលពីថ្ងៃទី ២៣ ខែកញ្ញា ប៉ុន្តែតំណាងរាស្រ្តជាប់ឆ្នោតទាំង ៥៥ របស់គណបក្សសង្គ្រោះជាតិ បានរក្សាជំហរធ្វើពហិការ។
លោក យៀប បានអះអាងថា ការបំបែកក្រសួងឧស្សាហកម្ម រ៉ែ និងថាមពលនេះនឹងផ្តល់លទ្ធភាពដល់មន្រ្តី ឲ្យផ្តោតកិច្ចខិតខំប្រឹងប្រែងរបស់ខ្លួន និងបំពេញការងារបានច្រើនថែមទៀត។ ប៉ុន្តែគណបក្សប្រឆាំង បានលើកឡើងថា វាគ្រាន់តែជួយពង្រឹងអំណាចរបស់គណបក្សប្រជាជន និងបង្កើតការិយាល័យធិបតេយ្យថែមទៀតប៉ុណ្ណោះ។
លោក យៀប បានបន្តថា៖ «[ឧស្សាហកម្មរឹងមាំ] មានសារៈសំខាន់ចំពោះផលប្រយោជន៍ជាតិ ដូច្នេះ យើងត្រូវធានាថា រដ្ឋាភិបាលធ្វើការមានប្រសិទិ្ធភាព»។
លោក យឹម សុវណ្ណ អ្នកនាំពាក្យគណបក្សសង្គ្រោះ ជាតិ បានថ្លែងកាលពីម្សិលមិញថា ការបង្កើតក្រសួងថ្មី នឹងមិនជួយឧស្សាហកម្មនេះបានច្រើនទេ ទន្ទឹមនឹងនេះវាបង្កើនឧបសគ្គ ការិយាល័យធិបតេយ្យកាន់តែច្រើន។ លោកបានបន្តថា៖ «វាគ្មានប្រយោជន៍ទេ។ នេះគ្រាន់តែបង្កើនការិយាល័យធិបតេយ្យ ខ្ជះខ្ជាយថវិកាជាតិ និងបង្កើនការចែករំលែកអំណាចរបស់បក្សពួក»។
ក្នុងរបៀបវារៈនៅសម័យប្រជុំរដ្ឋសភានៅថ្ងៃស្អែកនេះ គឺមានសេចក្តីព្រាងច្បាប់ថវិកាជាតិឆ្នាំ ២០១៤ ដែលកំណត់ថវិកាជាង ៦ លានដុល្លារ ដល់ក្រសួងឧស្សាហកម្ម រ៉ែ និងថាមពល៕
ប្រភពពី៖ ភ្នំពេញ ប៉ុស្តិ៍
No comments:
Post a Comment