 |
| ទិដ្ឋភាពទឹកជំនន់នៅខេត្តបាត់ដំបងកាលពីខែមុន។ គ្រោះទឹកជំនន់ឆ្នាំនេះត្រូវបានប៉ាន់ប្រមាណថាខូចខាតជាង ១ពាន់លានដុល្លារ។ រូបថត ម៉ៃ វីរៈ |
ភ្នំពេញៈ តំណាងគ្រឹះស្ថានមីក្រូហិរញ្ញវត្ថុ (MFI) ឲ្យដឹងកាលពី ថ្ងៃម្សិលមិញថា ចំនួនអ្នករងផលប៉ះពាល់ដោយគ្រោះទឹកជំនន់ដែលពិបាកក្នុងការសង ប្រាក់ត្រឡប់មកវិញមានចំនួនតិចតួចប៉ុណ្ណោះ ហើយអ្នកទាំងនោះនឹងទទួលបានការយោគយល់។
ការលើកឡើងនេះបានធ្វើឡើងបន្ទាប់ពីរដ្ឋាភិបាលកម្ពុជាបានបង្ហាញ ពីក្តីបារម្ភទាក់ទងនឹងលទ្ធភាពសងបំណុលរបស់កសិករដែលបានរងការ ប៉ះពាល់ដោយទឹកជំនន់ ហើយស្នើឲ្យស្ថាប័នផ្តល់កម្ចីពន្យារពេលសងបំណុល និងផ្តល់ ការអនុគ្រោះផ្សេងៗដើម្បីចៀសវាងការរឹបអូសទ្រព្យសម្បត្តិរបស់ ប្រជាពលរដ្ឋ។
លោក ជា ផល្លារិន អគ្គនាយកគ្រឹះស្ថានមីក្រូហិរញ្ញវត្ថុ អម្រឹត ដែលជាគ្រឹះស្ថានធំលំដាប់ទីពីរនៅកម្ពុជាបានប្រាប់ភ្នំពេញ ប៉ុស្តិ៍កាលពីម្សិលមិញថា ស្ថាប័នរបស់លោកបានរាយការណ៍ពីចំនួនអតិថិជនដែលប្រឈមនឹងការពិបាក សងកម្ចីទៅធនាគារជាតិនៃកម្ពុជារួចហើយ។ ចំនួនអតិថិជនដែលប៉ះពាល់ជាក់ស្តែងមិនមានច្រើនទេ។
លោកថ្លែងថា៖ «យើងបានពិចារណាលើការអំពាវនាវរបស់រដ្ឋាភិបាល ហើយយើងវាយតម្លៃលទ្ធភាពសងបំណុលរបស់អតិថិជនដោយផ្អែកលើស្ថានភាព ជាក់ស្តែង។ យើងត្រូវតែដឹងពីស្ថានភាពជាក់ស្តែងឲ្យបានច្បាស់ បើមិនដូច្នេះវាអាចប៉ះពាល់ដល់និរន្តរភាពរបស់ឧស្សាហកម្មនេះ»។ លោកបន្តថា ប្រតិបត្តិករហិរញ្ញវត្ថុត្រូវតែចៀសវាងករណីបំភាន់ណាមួយដែលអតិថិជន ខ្លះអាចផ្តេកផ្តួលទៅតាមការអំពាវនាវ របស់រដ្ឋាភិបាល បើទោះបីជាពួកគេមិនបានរងការប៉ះពាល់ ឬ រងគ្រោះធ្ងន់ធ្ងរក៏ដោយ។
នាយករដ្ឋមន្ត្រី ហ៊ុន សែន កាលពីថ្ងៃសុក្របានអំពាវនាវដល់គ្រឹះហិរញ្ញវត្ថុ រួមមាន ធនាគារ គ្រឹះស្ថានមីក្រូហិរញ្ញវត្ថុ និងអ្នកចងការតាមភូមិឲ្យផ្តល់ការអនុគ្រោះនានាដល់កូនបំណុល ដែលបានរងគ្រោះធ្ងន់ធ្ងរដោយសារទឹកជំនន់នៅឆ្នាំ ២០១៣នេះ និងអំពាវនាវឲ្យចៀសវាងការបង្ខំណាមួយទាក់ទងទៅនឹងសងបំណុល។
លោកបានស្នើឲ្យម្ចាស់បំណុលផ្តល់ការអនុគ្រោះលើបីចំណុចសំខាន់ៗ ដល់កូនបំណុលរួមមានការពន្យារពេលក្នុងការសងកម្ចីដោយមិនមានការ ផាកពិន័យ ការមិនយកការប្រាក់ ឬបន្ធូរបន្ថយការប្រាក់ទាបដល់អតិថិជន និងការផ្តល់កម្ចី បន្ថែមដើម្បីឲ្យប្រជាជនដែលរងគ្រោះមានលទ្ធភាពវិនិយោគដើម្បី ស្តារជីវភាពឡើងវិញ។ លោកថ្លែងថា៖ «ខ្ញុំអំពាវនាវសម្រាប់តែប្រជាពលរដ្ឋ ដែលរងផលប៉ះពាល់ដោយទឹកជំនន់ហើយដែលបានរកស៊ីដោយសុចរិតទេ ខ្ញុំមិនបានអំពាវនាវសម្រាប់អ្នកដែលខ្ចីប្រាក់គេយកទៅលេងល្បែង នោះឡើយ»។
របាយការណ៍ពីសមាគមគ្រឹះស្ថានមីក្រូហិរញ្ញវត្ថុ នៅកម្ពុជា ចេញផ្សាយកាលពីចុងសប្តាហ៍មុនបង្ហាញថា គ្រឹះស្ថានមីក្រូហិរញ្ញវត្ថុសរុប៣៥ បានផ្តល់កម្ចីជិត១,២ពាន់លានដុល្លារទៅអតិថិជនគិតត្រឹមដំណាច់ខែ កញ្ញា គឺកើនឡើងពីជិត១,១ ពាន់លានដុល្លារកាលពីដំណាច់ខែមិថុនា។
លោក ប៊ុន មុនី ប្រធានសមាគមគ្រឹះស្ថានមីក្រូហិរញ្ញវត្ថុកម្ពុជា និងជានាយកប្រតិបត្តិគ្រឹះស្ថានមីក្រូហិរញ្ញវត្ថុស្ថាបនាបញ្ជាក់ ប្រាប់ភ្នំពេញ ប៉ុស្តិ៍ កាលពីសប្តាហ៍មុនថា ក្នុងចំណោមប្រាក់កម្ចីសរុបក្នុងឧស្សាហកម្មនេះ មានកម្ចីប្រមាណ ៣០ ភាគរយបានផ្តល់ទៅវិស័យកសិកម្ម ហើយក្នុងនោះការផ្តល់ទៅលើការដាំដុះស្រូវមានតិចតួចនៅឡើយ។ លោកអះអាងថា ក្នុងចំណោមអតិថិជនសរុប៧៦ ០០០ គ្រួសារដែលទទួលកម្ចីពីស្ថាបនា មានអតិថិជន៤៥ គ្រួសាររងផលប៉ះពាល់ ហើយគ្រឹះស្ថានរបស់លោកនឹងផ្តល់ការអនុគ្រោះនានាស្របតាមស្ថានភាព ជាក់ស្តែង។
លោក ស៊ឹម សេនាជាតិ នាយកគ្រប់គ្រងទូទៅគ្រឹះស្ថានមីក្រូហិរញ្ញវត្ថុប្រាសាក់បានឲ្យ ដឹងថា គ្រឹះស្ថានលោកបានកត់ចំណាំអតិថិជនជាង៣០០នាក់ក្នុងចំណោម ១៨០ ០០០នាក់ ដែលលទ្ធភាពសងបំណុលរបស់ពួកគេរងការប៉ះពាល់ដោយសារទឹកជំនន់។ លោកថ្លែងថា៖ «វាមិនមែនជារឿងថ្មីនោះទេ ហើយវាមិនមែនជាការបារម្ភធ្ងន់ធ្ងរឡើយ»៕
No comments:
Post a Comment