 |
| លោកអនុប្រធានាធិបតីអាមេរិកJoe Biden និងលោកស្រី ប្រធានាធិបតីកូរ៉េខាងត្បូង Park Geun-Hey |
លោកអនុប្រធានាធិបតីអាមេរិក Joe Biden បានគូសបញ្ជាក់ជាថ្មីនៅថ្ងៃសុក្រទី ៦ ធ្នូនេះ ពីទីក្រុងសេអ៊ូល អំពីកាតព្វកិច្ចការពារសម្ព័ន្ធមិត្តនៅអាស៊ីប៉ាស៊ីហ្វិក ជាពិសេសកូរ៉េខាងត្បូង និងការពារប្រយោជន៍អាមេរិកផ្ទាល់ ពីការគំរាមកំហែងរបស់កូរ៉េខាងជើង ដូចដែលមានចែងក្នុងផែនការយុទ្ធសាស្ត្រអាមេរិកប្រចាំតំបន់អាស៊ី។ លោកអនុប្រធានាធិបតីអាមេរិក ដែលកំពុងស្ថិតនៅប្រទេសកូរ៉េខាងជើង ក្នុងក្របខ័ណ្ឌទស្សនកិច្ចមួយជុំ បន្ទាប់ពីជប៉ុននិងចិន។
គឺក្រោយជំនួបពិភាក្សាជាមួយលោកស្រីប្រធានាធិបតី Park Geun-Hye និងក្រោយពីបានថ្លែងការណ៍នៅសកលវិទ្យាល័យ Yonsei ដែលលោក Joe Biden បានប្រកាសក្តែងៗអំពីយុទ្ធសាស្ត្រអាមេរិកនៅតំបន់អាស៊ីជាថ្មី អំពីការការពារដាច់ខាត តាមគ្រប់មធ្យោបាយ សម្ព័ន្ធមិត្តពីការគំរាមកំហែងរបស់កូរ៉េខាងជើង។ កូរ៉េខាងជើង ដែលបើតាមរូបភាពផ្កាយរណប ទំនងជាបានផ្តើមសកម្មភាពនៅមជ្ឈមណ្ឌលនុយក្លេអ៊ែរឡើងវិញ។
នយោបាយអាមេរិកនៅអាស៊ីរបស់រដ្ឋបាលលោក បារ៉ាក់ អូបាម៉ា ដែលចង់បានលំនឹងរវាងនយោបាយការទូតនិងយុទ្ធសាស្ត្រការពារអាស៊ី នឹងមិនត្រូវប្តូរផ្លាស់ ឬសើរើប៉ះពាល់ទេ។ អាមេរិកការពារមិត្តជានិច្ច ហើយក៏មិននិយាយអ្វីមុនឡើយ ចំពោះអ្នកចង់សាកល្បងភ្នាល់ជាមួយអាមេរិកនោះ។ នេះជាអះអាងបន្ថែមរបស់លោក Joe Biden។
សេអ៊ូល ជាដំណាក់កាលចុងក្រោយនៃដំណើរទស្សនកិច្ចមួយជុំតូចរបស់លោកអនុប្រធានាធិបតី បន្ទាប់ពីប្រទេសជប៉ុននិងចិន។ ទស្សនកិច្ច ធ្វើឡើងក្នុងបំណងចង់បន្ធូរបន្ថយភាពតានតឹង បណ្តាលមកពីការប្រកាសបង្កើតព្រំដែនហោះហើរជាឯកតោភាគីរបស់ចិន។ លោក Joe Biden បានសម្តែងការព្រួយបារម្ភខ្លាំង ខ្លាចមានការប៉ះទង្គិចគ្នា នៅពេលឃើញសេអ៊ូល និងតូក្យូ បញ្ជូនយន្តហោះចម្បាំងម្តងម្នាក់ៗប្តូរវេន ហោះលើតំបន់ចិនហាមឃាត់ ជាពិសេសពេលបានឮពាក្យគំរាមកំហែងរបស់កូរ៉េខាងត្បូងចង់បង្កើតតំបន់ហាមឃាត់សងសឹកវិញ។
ប៉ុន្តែពេលស្ថិតនៅក្រុងប៉េកាំង លោកអនុប្រធានាធិបតីអាមេរិកមិនបានបញ្ចេញកាយវិការអ្វីបង្ខំចិនឱ្យដកថយឡើយ។ ពេលមកដល់សេអ៊ូល លោកបានត្រឹមបញ្ជាក់ជាថ្មីអំពីជំហរអាមេរិក ប្រឆាំងនឹងផែនការរបស់ចិន តែបានឆ្លៀតដាក់គំនាបជាប្រយោលលើកូរ៉េខាងត្បូងឱ្យខិតខំសម្រួលទំនាក់ទំនងល្អជាមួយជប៉ុន ដែលជាសម្ព័ន្ធមិត្តម្នាក់ដែររបស់អាមេរិក តែធ្លាប់មានប្រវត្តិជូរចត់ជាមួយនឹងសេអ៊ូល។ ព្រោះបើតាមអាមេរិកកូរ៉េខាងត្បូងនិងជប៉ុនសហការគ្នាល្អ នោះតំបន់អាស៊ីទាំងមូលពិតជាមានស្ថិរភាព ហើយជាស្ថិរភាពដ៏យូរអង្វែង៕
ប្រភពពី៖ ខេមរភាសា
No comments:
Post a Comment