 |
| ក្រុមគ្រួសារចិន ស្រែកយំ ពេលឮនាយករដ្ឋមន្រ្តីម៉ាឡេស៊ី និយាយថា យន្តហោះធ្លាក់ក្នុងសមុទ្រឥណ្ឌា និងពុំមានអ្នក នៅរស់(រូបថតពីWall Street Journal) |
ក្រុមគ្រសារជនជាតិចិនធ្វើដំណើរលើយន្តហោះMH370 បានផ្សព្វផ្សាយនូវសេចក្តីថ្លែងការណ៍រួមទំនងជាអនាមិក ចោទរដ្ឋាភិបាលម៉ាឡេស៊ីថា ចេញសេចក្តីថ្លែងការណ៍ ពុំមានភ័ស្តុតាងច្បាស់លាស់ណាមួយ ដែលថាយន្តហោះMH370 ធ្លាក់ចូលសមុទ្រឥណ្ឌាភាគខាងត្បូង និងមិនមានមនុស្សនៅរស់។
សារព័ត៌មានបាងកកប៉ុស្តិ៍ ចុះផ្សាយដោយលើកឡើងពីសេចក្តីថ្លែងការណ៍ថា ចាប់តាំងពីថ្ងៃទី០៨ខែមីនា នៅពេលរដ្ឋាភិបាលម៉ាឡេស៊ី ប្រកាសថា យន្តហោះMH370 បានបាត់ការទាក់ទងរហូតមកដល់ថ្ងៃនេះ ១៨ថ្ងៃកន្លងទៅ ដែលរដ្ឋាភិបាលម៉ាឡេស៊ី និងទាហាន ព្យាយាមជាបន្តបន្ទាប់ក្នុងការពន្យាពេល បោកប្រាស់គ្រួសារជនរងគ្រោះ និងបោកពិភពលោកទាំងមូល។
សេចក្តីថ្លែងការណ៍បន្តថា អាកប្បកិរិយាឥតខ្មាសអៀននេះ មិនត្រឹមតែបន្លំ និងធ្វើឲ្យគ្រួសារឈឺចាប់ទេ តែនាំទៅរកផ្លូវខុស និងពន្យាសកម្មភាពក្នុងការជួយសង្គ្រោះ ចំណាយធនធានមនុស្ស និងសម្ភារៈជាច្រើន និងបាត់បង់ពេលវេលា សម្រាប់កិច្ចប្រឹងប្រែងជួយសង្គ្រោះ។ក្រុមគ្រួសារជនជាតិចិន ដែលជាអ្នកធ្វើដំណើរច្រើនជាងគេ លើកឡើងថា ប្រសិនបើអ្នកធ្វើដំណើរទាំង១៥៤នាក់ ពិតជាបាត់បង់ជីវិត ក្រុមហ៊ុនអាកាសចរណ៍ម៉ាឡេស៊ី រដ្ឋាភិបាលម៉ាឡេស៊ី និងទាហាន ជាអ្នកសម្លាប់ពួកគេ។
សេចក្តីថ្លែងការណ៍រួមបន្តថា«យើងជាគ្រួសារជនរងគ្រោះនៅលើយន្តហោះ នឹងតវ៉ាប្រឆាំងខ្លាំងបំផុតលើពួកគេ។ យើងនឹងរកមធ្យោបាយ តាមដែលអាចធ្វើទៅបាន ដើម្បីតាមសកម្មភាពឧក្រិដ្ឋកម្ម ដែលមិនអាចលើកលែងទោសបាន និងការទទួលខុសត្រូវរបស់អ្នកទាំងបី(ក្រុមហ៊ុនអាកាសចរណ៍ម៉ាឡេស៊ី រដ្ឋាភិបាលម៉ាឡេស៊ី និងទាហាន)»។
នាយករដ្ឋមន្ត្រីម៉ាឡេស៊ី លោក Najib Razak និយាយកាលពីថ្ងៃចន្ទនេះថា យន្តហោះMH370 ដែលបាត់រយៈពេល១៧ថ្ងៃមកហើយ បានធ្លាក់នៅក្នុងសមុទ្រឥណ្ឌា ហើយអ្នកធ្វើដំណើរទាំងអស់ ប្រហែលជាស្លាប់នៅទីនោះ។លោក Najib Razak និយាយថា ការវិភាគរកឃើញថា យន្តហោះ បានបាត់នៅក្នុងសមុទ្រឥណ្ឌាភាគខាងត្បូង ដែលជាគោលដៅចុងក្រោយ ហើយតំបន់នោះ ស្ថិតនៅភាគខាងលិចទីក្រុងPerth របស់អូស្ត្រាលី។ លោកបញ្ជាក់ថា វាជាភាពសោកសៅទីបំផុត និងសោកស្តាយសម្រាប់គ្រួសារអ្នកធ្វើដំណើរ ហើយអ្វីដែលត្រូវតែជូនដំណឹងគឺថា យន្តហោះMH370 ធ្លាក់ទៅក្នុងសមុទ្រឥណ្ឌាភាគខាងត្បូង។
សារដែលផ្ញើទៅកាន់ក្រុមគ្រួសារ ជនរងគ្រោះនៅថ្ងៃចន្ទនេះ ដែលសារព័ត៌មានBBCចុះផ្សាយ សរសេរថា ក្រុមហ៊ុនអាកាសចរណ៍ម៉ាឡេស៊ី សោកស្តាយជាពន់ពេក ដែលយើងត្រូវសន្មត់ពីក្រោយចម្ងល់នានាដែលមានហេតុផលថា យន្តហោះMH370 បានបាត់នៅសមុទ្រឥណ្ឌាភាគខាងត្បូង ហើយពុំមានអ្នកនៅរស់ទេ៕
ប្រភពពី៖ VOD
No comments:
Post a Comment